Seferxan la Tebrizlei Ushaqlar (2006 ve 2002. Nov)

Pdf File: 242 KB

صفرخان لا تبريزلي اوشاقلار

ائله بيل دونن ايدي! بو يازيني دؤرد ايل بوندان اؤنجه(صفرخان بو دونيادان كؤچن زامان) فارسجا يازديم، و اينترنت سايتلاريندا اوخوجولار طرفيندن ياخشي ماراقلاندي! بو ايل صفرخان ايل دؤنومونده همن يازيني توركجه يازيرام و بير آز دا اونا باشقا سؤزلر آرتيريرام! باخيشلارينيزي گؤزله ييرم سايقيلي ديلداشلاريم.

* * * * *

1381

گوز اورتاسي (آبان آيي) *

þ بوگون ايش باشينا بيرآز گئج يئتيشديم؛ ميز داليسيندا اوتوران زامان، تورك امكداشيم منه دئيير: «صفرخاني تانيييرمي سان؟»

تعجوب ائليرم! چون او توركدور، آما او توركلردن يوخ كي سيز فيكر ائليرسينيز. اونا دئييرم: «بير-ايكي يئديجه(هفته) بوندان قاباق فوت ائله ميشدير؛ نئجه؟!». دئيير: «كيشي، بو ايرانين نه بؤيوك آداملاري واريميش كي اونلاري تانيماييرميشيق! يازيق، 32 ايل دوستاق(زندان) ايچينده ايميش، حتي نئلسون ماندللا كيمي آداملاردان دا چوخ»! اورگيمده دئييرم، احسن سنه كي سن ده داي اؤز توركلوگونله چتين ليك يوخوندور! آنجاق، بيليرم كي آدرئسي بير يئردن يانليش آليب! چون «ايندي نه اولوب كي صفرخانا گؤره دانيشيرسان؟» سوردوغوم زامان، دئيير: « توت همشهري گوندليگيني(جوما آخشامي، 1381ين آبان آيي)، اوخو»...

بله... همشهري قزئتي صفرخان قهرمانيان دان بؤيوك بير گؤرونتو(عكس) ووروب و ايري تيتر ايله يازيب: «11000 گون دوستاق دا»؛ گوندليكي اونون اليندن قاپيب و ايشي اؤتورورم!

مقاله ني سونا قدر و حتي مسعود بهنود جنابي يازان سياسي قيراق يازيسي ني دا اوخويورام، آنجاق ائله بيل بو يازيلار دا اؤز ايتيرديگمي تاپابيلميرم. گئرچكدن، يازيق صفرخان! بهنود يازميشدي: «صفرخاني گؤرموشدوم. بير اورگي ساده(!) كيشي كي دئسم سياست دن بير شئي آنلاميردي، آرتيق دانيشماميشام»! بهنود دوز سؤيله ميشدير، چونكو صفرخان سياست ايله خالقي اوينادان بير آدام دئييلدي؛ او تكجه اؤز اولوسونا و آنا يوردونا ايشله ميشدير. حقيقتا يازيق صفرخان كي 11 مين گون دوستاق دا اولماغي، بو قزئت و او قزئتين تيتر دولدورماغينا مصرف اولونموش، اؤزوده اؤلمگيندن سونرا! يولداشيم، همن قديم كي همشهريم دير!

گونده ليك ده كي يازيلاري نه قدر اوخويورام، آزراق دوشونورم. فيكر ائديرم صفرخان باشقا بير دليل ايچين دوستاغا گئتسه ايدي، هدفلر و آرامانلارينا چوخراق ياناشارديلار، تكجه بونون يئرينه كي فئوداللار ايله قارشيلاشماسي و يا دا بو كي او تكجه بير اينسان ايدي و بير اينسان نئيه او قدر گرك زندان دا قالسين كي چوروسون؟ بيز ده بشر حاقلاريندان بير آز باش چيخارديريق، حتي او «بشر» آذربايجان خالقينين حاقلار اؤدمه سي ايچين، پيشه وري دؤولتينده، ايشله ميش بير كيمسه اولسون!

آه... آذربايجان...! بو سنين نئچه مينجي قوربانليغيندير؟ ديليني، تورپاغيني، قهرمانلاريني و بالالاريني باغيشلادين...

همشهري، صفرخانين تشييع جنازه سي مراسيميندن ده بير گؤرونتو، چاپ ائتميشدير. جسدي تشييع ائدنلرين بير چوخو، صفرخانين گؤرونتولريني اللرينه آلميشلار. گوندليك ده كي عكسلري زوم ائتمك اولماز، آنجاق بيليرم، پلاكارد دا كي يازيلار توركجه دير. نئچه نفرين قيافه سي ده تانيش دير. ائله نظره گلير كي اونلار دا بو مطبوعاتين رفورميستي(اصلاحاتي) دالغالي اققيانوسوندا باتيب و ال-آياق ووروب و چاپالاماقداديرلار؛ ولي بير ده ميندارام اصلاح طلب درگيلر، كي مني او قدر دويغولانديردينيز كي بو سؤزلري يازديم!

بونا فيكر ائديرم، ايندي ايگيرمي دؤرد ياشيم وار(بو يازيني توركجه يازديغيم چاغ 28 ياشيم وار!) و بو 24ايل ليك ياشاييش دا، صفرخان دينجلمكده ايميش؛ البته دوستاغين ائشيگينده اولماغا، دينج اولماق معناسي وئريرم! منيم 24 ايليمي چارپين(ضرب ائدين) 365 گونه؛ تزه اولور 8760 گون! ياني گينه ده ايكي مين گون، صفرخانين حبس مودتيندن آزدير(دؤرد ايل يا 1460 گون ده گئچيب، آما گينه ده يئدي يوز سكسن گون آز گتيريرم)!

...

þ همشهرينين اوشاقلارا اؤزل اولان درگي ني(دوچرخه) چئويرركن، بو فيكيرلرين ايچينده يه م كي مكتوبلار صحيفه سينده، دوچرخه نين تبريز ده كي افتخاري ژورناليستي، اؤز «تهروني» لهجه سي ايله، «تهرانلي اوشاقلارا» بئله يازميشدير:

«سلاملار!

سنينله يه م كي ايندي اوتوروب و راحات خيال لا، دوچرخه ني ورق ورورسان؛ توجه ائله. گؤزله اليندن دوشمه سين! دقتلي اول. ياواش، ياواش جا!!

اصلا نيگران اولما؛ چونكو پنجشنبه لر همشهري تاپماغي، سو ايچمك كيمي راحات دير. چتين ليك بيزيم دير! بيزيك كي همشه، كاسا-كوزا باشيميزا سينار! يوخ، يوخ! سن نئيه اوزولوب كدرلنيرسن؟! سن اؤز دوچرخه ني چئوير.

بيز همشه قبول ائتميشيك كي تهران، باشقا(!) شهرلردن، باشقا(ساواي) دير. بو نو دا آرتير! بونا باخماياراق كي تيروئيد غودده سي بوغازيميزدا شيشيب؛ آنجاق بير ايش گؤرمك اولماز».

* * * * *

1385

گوز اورتاسي (آبان آيي)

þ دؤرد ايل صفرخانين اؤلوموندن گئچير و اونون وفات ايل دؤنومونه گلنلرين سايي سي، احمد شاملونون قبرينين اوستونه گلنلردن آزدير! حتي عكاس و فيلم گؤتورنين سايي سي، توركلر له بيردير! بورا كرجين امامزاده طاهيري دير.

ايكي دنه شمع صفرخانين قبرينين اوستونده يانيرلار و 7- 8 گنج دوروبلار و ائله بيل، گؤزله ييرلر قالان آداملار گلندن سونرا اؤز تؤرنلرين باشلاسينلار. اينترنت ده ياييلميش بيلديريلره گؤره قرار دير ساعات 3 دن 5 قدر آنما تؤرني قورولسون. هاوا دا بير آز سويوخ دور و گلنلرين الري جيبلرينده دير و اوشويورلر.

من ده يورقونلوغوما گؤره گئديب بير دمير نيمكتين اوستونده اوتوردوم؛ دميرين سويوغو مني يئريمده تيتره مه سالميشدي! جوما آخشامي ايدي و بونا گؤره قبريستان چوخ شولوق ايدي. و هر يئر دن نوحه، اوخشاما وبعضي يئرلردن ده آغلاماق سسي گليردي و بير ياندان دا شاملونون طرفدارلاري دال با دال سيگار پوفله يه ركن، توستو ايچينده، اونون شئعرلرين اوجا سس ايله، ديكلمه ائديرديلر:

بو نئچه مينجي دفه ايدي كي ائشيديرديم: «عشق را در پستوي خانه نهان بايد كرد...(سئودا گرك ائوين بوجاغين دا گيزلنيلسين...!)»؛ من ده اؤزومله بئله فيكر ائليرم، صفرخانين تؤرنينه گلمه ينلر حتما گئديبلر سئودالاريني گيزلتسينلر!

اونلارين ايچينده بير قادين صفرخان قبرينين اوستونده كي آداملاري گؤروب و بير شئعر ديكلمه ائدير آذربايجانا گؤره! شئعري دولو ايدي آذربايجانين داغلاري، داشلاري، تورپاقلاري، بابك، ستارخان، شاه اسماعيل و باشقا قورخماز و غئيرتلي آداملارينا، آنجاق من و سن ايسته ين شئعرلردن دئييلدي!!

ساعات بئشه، آز قالير و سايي آرتماييب و عكاسلار دا چيخيب گئديبلر! صفرخانين قبرينه گلنلرين بيريسي اللريني اؤكله ييب و دئيير دئيه سن گلن اولمادي! گلين اؤزوموز مراسيمي قوراق. شاملونون قبرينه گلنلر سوسوب و گؤز آلتي صفرخانين مزارينا باخيرلار.

گلنلرين اوچ – دؤرد نفري شئعر اوخويورلار، صفرخانين ياشاييشيندان دانيشيرلار و دئييرلر كي او نئچه ايل نلسون ماندللا دان دا چوخ دوستاق دا قاليب. قيراق دا كي آداملاردا ييغينتي يه قاريشيب ايسته ييرلر گؤره لر نه خبر دير. من ده اونلاردان سورورام: « سيزجه، نئيه صفرخان ايران دا چوخ آدلانماييب، حالبوكي سيز دئييرسينيز دونيانين ان چوخ موددتلي حبس ده اولان آدام دير؟». هامي سينين يانيت(جاواب) ايچين چوخلو سؤزلر وارلاري دئسين دئيير، و بونا گؤره، بو خول دان او خولا آتيليرلار. فرض ائدين آذربايجانين سكسن ايلليك مظلوميتلرين و حاقسيزليقلاريني ياريم دقيقه ده دانيشاسان! گينه سوروشورام: نه آز آدام گليب، به آذربايجان بيلي يوردلولار توپلومونون اوشاقلاري نئيه گلمه ميشلر؟! گئچن ايللر هامي گلردي آخي.

بيري منه بير سؤز دئدي كي بير آز چكدي دوشونه م منظورو نه دير: «بيليرسن نه وار؟ سنه بير اؤرنك دئييرم؛ ائله بيل كي بير شئي اوجوز اولورسا، هامي آلابيلر؛ ايندي هر نه باهالاشميش و هر كيمسه نين آلماغا گوجو يوخدور!». بيري سي ده دئيير : «بورا بو سؤزلرين دانيشماق يئري دئييل و ياخشي آچيقلاماق اولمور، آنجاق بونو بيل كي آدامين بوغازيندا پيچاق اولسا نه ايش گؤره بيلر؟ گلن هفته گلرسن ستارخان تؤرنينه**، اورا دا يقين كي چوخ آدام گلجك». آللاه بيلير او منه گؤره ناسيل فيكر ائتدي! گؤردوم يانيندا كي اوغلان ديرسكي ايله اونا وورور دئيير، اوتور!

þ گئجه دير. تهران كانالي بير پروقرام واري و اوندا رشيدي آدلي بير آپاريجي چيخيش ائدير. بو گنج كيشي، تبريزين اوستاني شبكه سيندن گليب تهرانا. ائله كي بيلير سينيز آذربايجان دا بو رسيم وار كيمسه ايشينده باشاري لي اولسا حتما گرك كؤچسون تهرانا!

فارسي ني فارسلاردان ياخشي دانيشير! رشيدي جنابي نين پروقلاملاريندا هردن بير آذربايجان موسيقي اولار و بونا گؤره راس گلسه باخارام.

رشيدي نين قوناغي، بو دفه آلمانلي، آنجاق كؤكو ايرانلي بير بدلچي(بدلكار) دير. آلماندان گليب و ايسته يير بوندان بئله، ماشيني دووارا چيرپماق و آشيرتماق ايله، اؤز وطنينين قوللوغوندا اولسون!

رشدي دئيير: ائله بيل آلمانين اوزمك ميللي تيمينده ده اولوب و آلمان ايچين دونياليق مقاملار كسب ائديبسن؟ بدلكار دئيير: هن، البته من اون ياشيمدان آلمان دا بؤيوموشم و اولمازدي آلمان دا، ايران بايراغييلا ياريشام. آنجاق بوندان بئله ايستيرم ايرانا دا قوللوق ائدم و ايرانين فيلم صنعتينه يارديم ائدم، چونكو من بير ايرانليييم.

رشيدي ده اونون وطنسئورليك دويغوسونو آلقيشلاييب و دئيير:

«بله، با هويت نميشه ريسك كرد (دوزدور، كيمليك ايله ريسك ائتمك اولماز)»!

آيدين . ك

گوز اورتاسي(آبان) 1385

‍Nov.2006

(ديدگاه شما راجع به اين مطالب)Bu Yazılara Görə Baxışlarınız:

* ) بو يازيين فارسجا متني:

http://www.danulduzu.20m.com/OyanBuyan/AntiChauvinism/SeferXan.htm

** ) بير هفته دن سونرا ستارخان تؤرنينده، قديم يولداشلارين بيريسينه راس گلديم و دئديم سنجه نئيه، اؤتن جوما آخشامي، صفرخان تؤرنينه آز آدام گلميش ايميش؟ او دا دئدي: «ستارخان بؤيوك سمبول دور و بونو صفرخانلا موقايسه ائتمه»

توجه:

اين وبلاگ در راستاي اصول پانزده و نوزدهم قانون اساسي جمهوري اسلامي ايران، در موضوعات فرهنگي-اجتماعي فعاليت کرده و نويسنده آن وابسته به هيچ گروه و حزب سياسي و ... نمي باشد.

AnaYurdum.20m.com

E-Mail:

celalkivi@publicist.com